Fënnef Regelen fir dem Juncker Moien ze soen

Ass dat do den Péckvillchen? Ma neen dat ass a Clown. 

Photo: Commissioun

Fënnef Regelen fir dem Juncker Moien ze soen

D’ ganz Welt weess, well t’gouf iwwerall iwwerdroen,

T’ muss een fäerten fir ’m Juncker Moien ze soen!

Ass et Ethylismus oder Testosterone?

Op allen Fall, déi Biller maachen schéin hir Ronn.

Dir wësst jo den Péckvillchen ass fir Witz a Spott,

Mee fir den Juncker ze këssen ass en awer glott!

Déi meescht Leit fäerten fir him ze no ze kommen,

Glatz an décken Bauch loossen sech all verdommen.

Wéi eng Géigenmesuren kann een do maachen,

Fir dass d’ Leit emol iwwer HIEN kënnen laachen?

De Péckvillchen gesäit do eng fënnef Pisten,

Géint de Juncker an déi aner Terroristen.

Hutt Dir een decken Bauch oder eng plakeg Kopp?

D’ Chancen sinn den Juncker kësst Iech do drop!

An sidd Dir den Jang, oder an Ungarn kamëss,

Dann schléit den Juncker Iech och nach eng an d’ Schnëss.

Wann Dir awer gären hätt hien kéim Iech nit ze no,

Gréisst en, d’ Zigarett am Bak, den Patt um Platto.

Dann fäert en, hien géing sech beim Këssen verbrennen,

An schlëmmer nach, t’ géing een den Patt em rënnen.

Dem Spaghetti Monster saïn Helm, beschützt d’ Plakäpp,

An den Hollande wiert sech mat der Mausfal am Réck.

Et ginn der déi wieren sech als Spatzeg Nenn,

Mee den Orban gräift nom Sak, an den Spaass ass um Enn.

Fir d’ Présidence brauch een een neien Protokoll,

Amplaz Moien ze soen gëtt einfach een geholl.

An dann sangen se all wéi een Kadettchen:
“Kättchen, Kättchen bréng dem Juncker nach ee Pättchen!”

Doch, doch der Juncker ist geplündert!

Ass dat do den Péckvillchen? Ma nee, 

dat ass een Kommissar an senger Residenz. 

Photo Zwitscher Joffer

Doch, doch der Juncker ist geplündert!

„ Nein, nein Jang, man sagt der Bengel HAT geplündert,“

Sou huet d‘ Anne Will den Asselborn verbessert.

„Freck, und auf der Cap, da hat der sich nicht abgemelld!

Der kriegte zum Plündern einen dicken Koup Geld!“

T ‘schéngt hien wunnt elo am siwen Stären Hotel,

Fir déi Räich an Schéin am Bréisseler Sofitel.

D’ Joffer beim Juncker zwitschert t‘ wär eng Residenz,

An bei Leiwen keng Spillplaz fir liddereg Pänz.

Seng Suite Présidentielle ass sou grouss wéi eist Land,

Den DSK huet alt do e puer Nuechten verbrannt.

Een Butler liest Iech all Wonsch vun der Fläsch,

A suergt fir d‘ Iessen an déi knaschteg Wäsch.

Op der Terrass ass een ganz exquisiten Gaart,

Virun der Dir eng Bentley wou een Chauffer waart.

Den Pompier de Garde bréngt steierfräi Zigaretten,

An wat illuster Gäscht soss nach gären hätten.

D‘ Residenz kënnt mat Wellness an enger Sauna,

Déi bréngen een zréck aus deem déifsten Koma.

Een exklusiven Chef kacht Carbonnades Flamandes,

Mat den beschten Fritten vun déi Säit vun Bande.

Den Xav sot, "et soll keen kloen, deem sinn mer gutt lass,

Hien huet schonn ëmmer gedreemt hien wär am Schlass."

Den Hotel Lobby ass voller Lobbyisten,

Nach vill méi wéi zu Lëtzebuerg d‘ Vëlos Pisten.

Mir Lëtzebuerger freeën eis iwwert säint villt Geld,

Hien kritt nach eng Prime de séjour an der friemer Welt!

Et sinn jo nit eis Suen, mee déi vun den Griichen,

An domat kennen mer egal wat fir eng stiichten.

Vläicht d‘ Residenz bezuelen, well dat een Hotel ass?

Den ganzen Rescht kennt op ee Koup bei der Sparkass,

Déi dann och onerhéiert deck Profitter mécht,

Déi den Gramegna als Dividend an saïn Budget stécht.

Lëtzebuerg an seng Flüchtlingswell

Sinn dat do Péckvillercher? 

Ma nee, dat ass eng Flüchtlingswell. Photo GovLu

Lëtzebuerg an seng Flüchtlingswell

Mir hunn an der Zäit eis eegen Leit verdriwwen,

Bliwwen sinn Auslänner, dat ass schéin duerchdriwwen.

Déi Flüchtlingswell goung entweder op Körperich,

Oder déi aner Säit bis hanner Sterpenich.

Sou entkoumen Dausenden den Propriétairen,

An den héijen Loyeren als Locatairen. 

Se hunn gebaut vun Alenuewen bis op Diddebuerg,

Souguer den Paschler Buergermeeschter ass vun Lëtzebuerg.

Den Xav sot: “Ech well nit Prömmjee vun engem Land sinn,

Wou d’ nächst Flüchtlingswellen nit preparéiert ginn.“

Am Ausland sangen der: “Wéi hunn Ech d’ Hierz sou wéi,”

All hätten se erëm  gär hiren Daach vun Stréi!

All Kéier wann d’ Regierung dat Lidd do héiert,

Dann kräischen se all, dat wär jo onerhéiert!

D’ nächst Flüchtlingswell kënnt bestëmmt, do ass keen Zweifel,

Mee dës kënnt vun hanner Arel an aus der Eifel.

Dann froen déi Lëtzebuerger Asyl doheem,

Mir huelen der awer nëmmen honnert an soss keen.

Well fir sech erëm doheem z’ integréieren,

Mussen se den Auslänner hir Sproochen léieren.

Den Etienne setzt Arméiszelter op den Glacis,

Spenden kommen aus dem Cap Vert an dem Mali,

An trotz der Séparatioun zwëschen Kierch an Staat,

Hëlleft d’ Caritas, an d’ Oktav gëtt ausgesat.

Lëtzebuerg ass nëmmen dat 17. glécklechst Land op der blöder Welt!

Ass dat do den Péckvillchen? Ma nee dat ass een granzegen Luxo.

Photo: Mir sinn glécklech mir sinn frou / UGDA

Lëtzebuerg ass nëmmen dat 17. glécklechst Land op der blöder Welt!

Den Péckvillchen ass schwäiwëll! 

Lëtzebuerg ass nëmmen Nummer 17 vun den glécklechsten Länner op der Welt:

Source: dem Jang seng UNO

A wien huet deenen aneren 16 d’ Prüfungsfroen am viraus ginn!?

Haalt elo den Baak  an sangt hei mat!

Dem REFERENDUM ass eng schéin MERDE ENFUER

Ass dat do den Péckvillchen? Ma nee, 

dat ass den Papagei “Dräimol Vläicht!” dien domm Froen beäntwert. 

Mosaik: FMT

Dem REFERENDUM ass eng schéin MERDE ENFUER

Am Anagramm läit d’ Wouerecht

Also mir waren an d’ Wahlen mam Wielerwëllen,

An den wëllen Wieler wollt mol giedlech brëllen:

“Roude Léif, komm mir trennen Kierch an Relioun!

Vun deem hei krut d’ Kierchefabrik den leschten Spoun!”

D’ Verfassungsreform gouf eng Verpassungsreform,

Eng verpassten Geleeënheet no aller Norm.

De wëllen Wieler kuscht, t’ ass keen dien sech muckst,

Wann d’ Muxelbuerger Regierung d’ Reform verjuckst.

Den siwenten Juni stinn mer dann all am Reen,

Mir mussen, vum Gesetz entschëllegt gëtt jo keen.

Mir ginn all richteg Äntwerten op falsch Froen.

Mee d’ Kierch am Staat mussen mer weider erdroen.

Verkuerbelt, ass dem Véckpillchen d’ Wuert “Märtt!” entfuer,

“Mat deem Referendum geet et mer lo awer duer.

Dien hei äntwert nit “Nee”, nit “Jo” mee awer “Vläicht”,

Well dat der Trennung vum Staat an vun der Kierch gläicht.”

Wat eigentlech fabrizéiert eng Kierchefabrik?

Ass dat do den Péckvillchen? 

Ma nee, dat ass een Kierchhunn. Photo Opus Dei

Wat eigentlech fabrizéiert eng Kierchefabrik?

Fir eng Äntwert, stellen mer eis emol ganz domm,

An ginn op Veianen, do läit d‘ Heck an der Kromm.

Do gouf gemuerkst op den Bietstill fir nach méi Cash,

Nit nëmmen schwaarz Séilen, mee och Cash gouf gewäsch.

Déi  Kierchefabrik ass eng richteg Denkfabrik,

Well do denkt den Dechen mat senger schwaarzer Clique:

“Kommt mir bauen eng Féckmillchen mat schwaarzem Geld,

Mir klauen dem Caesar säint Geld, t’ regéiert d’ Welt!”

Schéin gepriedegt, mee der Däiwel an der Sakristei,

Do gëtt den Afferstack opgebrach fir an d’ Pei.

Elo schneiden d’ Pafefrësser awer schéin Schnësser,

Well se all goufen gebiischt vun deenen Steierfrësser.

Dir wäert gesinn, hei kritt keen d’ Klacken gelaut,

Well d’ Gemeng huet nëmmen geaffert, t’ gouf näischt geklaut.

An esou bleift d’ Kierch am Duerf mat sengen Fabrikanten,

Mam Priedegtstull, Beichtstull, an den Ministranten.

Well t’ gëtt jo nach guer keng Trennung vun Kierch an Staat,

Esou hunn Ech alt d’ Referendumsfroen iwwersat.

An fir Veianen ass dat nach laang keng haart Noss,
Well elo gëtt jo schonn op Schoolleaks geschoss.

Vum Kierchtuerm jäitzt “Skandal” den Hunn an den Iesel,

Et wär elo een “Point de Presse” fir all Quisel:

“Mat Examensleaks verhanselt keen den Eyschen,

An d’ Hansen léisst sech och nit vermeischen!”

Ite, missa est

Hopp, a lass! Alles an den Werteunterricht!

Ass dat den Peckvillchen?
Nee dien do weess d' Examensfroen!
Photo: GovEdu

Hopp, a lass! Alles an den Werteunterricht!

An der Zäit, näischt geleiert? Dann gouf getuddelt!

T’ gouf eng Datz. An haut? Do gëtt einfach gefuddelt!

Proffen an Kanner knäipen Examensfroen,

Pappen an Mammen hunn näischt dergéint ze soen.

Dat léiert een alles am Werteunterricht,

Dat ass keen Béchsfach, keen Péckvillchen Gedicht.

Ma jëmmen nee, do léiert een d’ Werter vun haut,

An wichteg Spréchwierder wei : Een dien litt, dien klaut.

Wéi een Dokter verschreift Iech gär eng Fréipensioun,

Wéi mécht een Geldwäsch an Steieroptimatioun?

An wéi wär et mat enger frauduléiser Faillite ?

Oder een Stage wéi een Steieren hannerzitt?

Am Nation Branding  sinn mer fir Schwaarzgeld bekannt,

Rulingen an Justizparadies kennt all Kand.

Werteunterricht dréint sech em Versteierung,

Steierhannerzéiung ass och eng Erzéiung.