Lëtzebuerg an seng Flüchtlingswell

Sinn dat do Péckvillercher? 

Ma nee, dat ass eng Flüchtlingswell. Photo GovLu

Lëtzebuerg an seng Flüchtlingswell

Mir hunn an der Zäit eis eegen Leit verdriwwen,

Bliwwen sinn Auslänner, dat ass schéin duerchdriwwen.

Déi Flüchtlingswell goung entweder op Körperich,

Oder déi aner Säit bis hanner Sterpenich.

Sou entkoumen Dausenden den Propriétairen,

An den héijen Loyeren als Locatairen. 

Se hunn gebaut vun Alenuewen bis op Diddebuerg,

Souguer den Paschler Buergermeeschter ass vun Lëtzebuerg.

Den Xav sot: “Ech well nit Prömmjee vun engem Land sinn,

Wou d’ nächst Flüchtlingswellen nit preparéiert ginn.“

Am Ausland sangen der: “Wéi hunn Ech d’ Hierz sou wéi,”

All hätten se erëm  gär hiren Daach vun Stréi!

All Kéier wann d’ Regierung dat Lidd do héiert,

Dann kräischen se all, dat wär jo onerhéiert!

D’ nächst Flüchtlingswell kënnt bestëmmt, do ass keen Zweifel,

Mee dës kënnt vun hanner Arel an aus der Eifel.

Dann froen déi Lëtzebuerger Asyl doheem,

Mir huelen der awer nëmmen honnert an soss keen.

Well fir sech erëm doheem z’ integréieren,

Mussen se den Auslänner hir Sproochen léieren.

Den Etienne setzt Arméiszelter op den Glacis,

Spenden kommen aus dem Cap Vert an dem Mali,

An trotz der Séparatioun zwëschen Kierch an Staat,

Hëlleft d’ Caritas, an d’ Oktav gëtt ausgesat.

Lëtzebuerg ass nëmmen dat 17. glécklechst Land op der blöder Welt!

Ass dat do den Péckvillchen? Ma nee dat ass een granzegen Luxo.

Photo: Mir sinn glécklech mir sinn frou / UGDA

Lëtzebuerg ass nëmmen dat 17. glécklechst Land op der blöder Welt!

Den Péckvillchen ass schwäiwëll! 

Lëtzebuerg ass nëmmen Nummer 17 vun den glécklechsten Länner op der Welt:

Source: dem Jang seng UNO

A wien huet deenen aneren 16 d’ Prüfungsfroen am viraus ginn!?

Haalt elo den Baak  an sangt hei mat!

Dem REFERENDUM ass eng schéin MERDE ENFUER

Ass dat do den Péckvillchen? Ma nee, 

dat ass den Papagei “Dräimol Vläicht!” dien domm Froen beäntwert. 

Mosaik: FMT

Dem REFERENDUM ass eng schéin MERDE ENFUER

Am Anagramm läit d’ Wouerecht

Also mir waren an d’ Wahlen mam Wielerwëllen,

An den wëllen Wieler wollt mol giedlech brëllen:

“Roude Léif, komm mir trennen Kierch an Relioun!

Vun deem hei krut d’ Kierchefabrik den leschten Spoun!”

D’ Verfassungsreform gouf eng Verpassungsreform,

Eng verpassten Geleeënheet no aller Norm.

De wëllen Wieler kuscht, t’ ass keen dien sech muckst,

Wann d’ Muxelbuerger Regierung d’ Reform verjuckst.

Den siwenten Juni stinn mer dann all am Reen,

Mir mussen, vum Gesetz entschëllegt gëtt jo keen.

Mir ginn all richteg Äntwerten op falsch Froen.

Mee d’ Kierch am Staat mussen mer weider erdroen.

Verkuerbelt, ass dem Véckpillchen d’ Wuert “Märtt!” entfuer,

“Mat deem Referendum geet et mer lo awer duer.

Dien hei äntwert nit “Nee”, nit “Jo” mee awer “Vläicht”,

Well dat der Trennung vum Staat an vun der Kierch gläicht.”

Wat eigentlech fabrizéiert eng Kierchefabrik?

Ass dat do den Péckvillchen? 

Ma nee, dat ass een Kierchhunn. Photo Opus Dei

Wat eigentlech fabrizéiert eng Kierchefabrik?

Fir eng Äntwert, stellen mer eis emol ganz domm,

An ginn op Veianen, do läit d‘ Heck an der Kromm.

Do gouf gemuerkst op den Bietstill fir nach méi Cash,

Nit nëmmen schwaarz Séilen, mee och Cash gouf gewäsch.

Déi  Kierchefabrik ass eng richteg Denkfabrik,

Well do denkt den Dechen mat senger schwaarzer Clique:

“Kommt mir bauen eng Féckmillchen mat schwaarzem Geld,

Mir klauen dem Caesar säint Geld, t’ regéiert d’ Welt!”

Schéin gepriedegt, mee der Däiwel an der Sakristei,

Do gëtt den Afferstack opgebrach fir an d’ Pei.

Elo schneiden d’ Pafefrësser awer schéin Schnësser,

Well se all goufen gebiischt vun deenen Steierfrësser.

Dir wäert gesinn, hei kritt keen d’ Klacken gelaut,

Well d’ Gemeng huet nëmmen geaffert, t’ gouf näischt geklaut.

An esou bleift d’ Kierch am Duerf mat sengen Fabrikanten,

Mam Priedegtstull, Beichtstull, an den Ministranten.

Well t’ gëtt jo nach guer keng Trennung vun Kierch an Staat,

Esou hunn Ech alt d’ Referendumsfroen iwwersat.

An fir Veianen ass dat nach laang keng haart Noss,
Well elo gëtt jo schonn op Schoolleaks geschoss.

Vum Kierchtuerm jäitzt “Skandal” den Hunn an den Iesel,

Et wär elo een “Point de Presse” fir all Quisel:

“Mat Examensleaks verhanselt keen den Eyschen,

An d’ Hansen léisst sech och nit vermeischen!”

Ite, missa est

Hopp, a lass! Alles an den Werteunterricht!

Ass dat den Peckvillchen?
Nee dien do weess d' Examensfroen!
Photo: GovEdu

Hopp, a lass! Alles an den Werteunterricht!

An der Zäit, näischt geleiert? Dann gouf getuddelt!

T’ gouf eng Datz. An haut? Do gëtt einfach gefuddelt!

Proffen an Kanner knäipen Examensfroen,

Pappen an Mammen hunn näischt dergéint ze soen.

Dat léiert een alles am Werteunterricht,

Dat ass keen Béchsfach, keen Péckvillchen Gedicht.

Ma jëmmen nee, do léiert een d’ Werter vun haut,

An wichteg Spréchwierder wei : Een dien litt, dien klaut.

Wéi een Dokter verschreift Iech gär eng Fréipensioun,

Wéi mécht een Geldwäsch an Steieroptimatioun?

An wéi wär et mat enger frauduléiser Faillite ?

Oder een Stage wéi een Steieren hannerzitt?

Am Nation Branding  sinn mer fir Schwaarzgeld bekannt,

Rulingen an Justizparadies kennt all Kand.

Werteunterricht dréint sech em Versteierung,

Steierhannerzéiung ass och eng Erzéiung.  

We’i den Schneider dem Braz d’Leviten liesen geet

Ass dat do den Péckvillchen? 

Ma nee, dat ass een maskéierten Abriecher. 

Photo LuxPolDep

We’i den Schneider dem Braz d’Leviten liesen geet

Zu Lëtzebuerg gëtt elo souvill agebrach,

Am beschten léisst een keen Schlëssel am Schlëssellach.

Dann man se engem wéinstens d’ fiischt Dir nit futti!

T’ sot een der Deeg t’ wär eng Band vun Multikulti!

T’ freet een sech, wéi geet dat do dann elo weider?

Well déi Raiber waren agebrach beim Schneider!

Déi wëssen dat do ass een zougänglechen Mann,

Och wann hien nit do ass, t’ kennt een awer eran.

Gleeft mer, déi Drëps do schléit dem Faass den Buedem an,

Vun elo un wäerten mer Käpp mat Neel erëm man.

Mir ginn, wéi soss, een Land vun Gesetz an Uerdnung!

“Jo,” sot den Braz, “t’ geet erëm Fouss, Panz, Kullang!”

Den Péckvillchen seet, Här Minister, Exzellenz,

Wéini kréien den Maybolli der dann emol laanscht Pänz?

Keen Enn, no zwielef Joer Geriichtsaffairen,

T’ gesäit aus wéi wann mer zu Brazzaville wären!

Den Péckvillchen weess wou den Putin ass!

Ass dat do den Péckvillchen? 

Ma nee, dat ass den Storch Stolichnaya. 

Photo BBBB

Den Péckvillchen weess wou den Putin ass!

“Wou ass den Putin?” freet d’ Welt ganz opgereegt.

Well zu Moskau näischt sech méi ëm hien beweegt.

Et sinn der déi soen hien wär an der Ukraine!

Oder bei ISIS? Wou ass en? Dat weess keen Schwäin!

Mee den Péckvillchen huet do alt méi Iwwersiicht.

T‘ war alt erëm den Juncker, dien huet eng gestiicht.

Well dien sot hien hätt gär eng Europa Arméi,

Dann zéien mer den Putin gutt iwwert den Knéi!

„O jo mat der Schnëss“ huet dunn den Putin gesot,

Du Spréif dees mech nit fäerten, dien hei war Zaldot!

Amplaz Krich fuerdren Ech Dech zum Duell eraus,

Du hues den Choix vun den Waffen, Du Micky Maus.“

„Gutt“ sot den Juncker, „d‘ Wahl ass Vodka aus der Strenz,

Torse nu an och d’ Pänz, eleng wéint der Transparenz.“

An den Juncker huet den Putin déif an d‘ Aen gekuckt.

Déi zwéin hunn Strenz iwwer Strenz voll Vodka geschluppt.

No e puer Eemeren vun deem Stolichnaya,

Wackelen eis Duellisten an em sie d‘ Gebaier,

Fir den Juncker war den Putin een klenge Fësch:

Dien leet nach aacht Deeg am Kreml ënnert dem Dësch.